Ymgysylltu â’r Cyhoedd

Mae ein gweithgareddau ymgysylltu â’r cyhoedd yn cynnwys y ffyrdd niferus y gellir rhannu gweithgarwch a manteision ymchwil y Brifysgol â’r cyhoedd.  Proses ddwy-ffordd yw hon sy’n cynnwys rhyngweithio a gwrando, â’r nod o greu manteision i’r ddwy ochr.

Yn yr Adran Gwyddor Data Poblogaethau, mae ymgysylltu’n rhan hanfodol o’n gwaith – rydym yn cynnwys aelodau’r cyhoedd o’r cychwyn cyntaf; o baratoi ceisiadau ymchwil, llywio cyfeiriad ymchwil sydd eisoes ar waith, lledaenu canlyniadau ac effaith ymchwil a gweithgarwch i waith ehangach, megis cynyddu ymwybyddiaeth o ddefnyddio data at ddibenion ymchwil.

PANELI CYHOEDDUS

Panel Defnyddwyr Ymchwil Cysylltu Data

Mae gan Wyddor Data Poblogaethau Banel Defnyddwyr a sefydlwyd yn 2011. Ar hyn o bryd, mae gennym 16 o aelodau ac rydym yn recriwtio’n barhaus. Mae aelodau’r panel yn rhan o bob elfen o’r broses ymchwil, o ddatblygu syniadau, rhoi cyngor ar geisiadau i brosesau cymeradwyo (drwy’r Panel Adolygu Llywodraethu Gwybodaeth annibynnol), i raeadru canfyddiadau ymchwil.

Mae rôl y panel yn cynnwys;

• Cynghori Ymchwilwyr ar faterion sy’n ymwneud â’u hymchwil neu ei effaith
• Cynghori ar y ffordd orau i ymgysylltu â’r cyhoedd
• Rhoi safbwyntiau ar faterion diogelu data
• Trafod cynigion ymchwil
• Adolygu gwybodaeth ar gyfer cynulleidfa leyg
• Gweithredu fel eiriolwr ar gyfer ymchwil cyswllt data

Darllenwch fwy am y Panel Defnyddwyr.